Ah jonge ja juh!
Poppenwier - 06-05-2023
Doet ik ein november belle waard om in kist op maat foar immen te meitsjen dy’t krekt overleden wie, moast ik alles op alles sette om dit op tiid klear te krijen. It wie sawysa al in drokke tiid, de kist moast ekstra grut, fan in spesjale houtsoort, en dan ek noch mei teksten der op.
“this side up” Ik tink dat de famylje bang wie dat de kist op syn kop yn it grêf komme soe…, en “fragile”.
Wylst ien fan ús jonges en ik de kist yn de auto setten, skeat it mysels ek noch yn de rêch, dat ik hie in minne middei. We moasten menear út it mortuarium fan Ljouwert helje. Ik belle dêr oan en mei help fan de meiwurkers dêr leinen we menear, dy’t inderaad flink oan de maat wie, yn de prachtige grutte kiste. Doe de kist yn de auto, en dwarstroch de stêd, nei harren flatsje ta, syn frou siet fertrietlik neist my.
De lift fan harren flat wie fan te foaren al opmetten, en de kist paste der krekt yn, mar mear ek net. We skoden de kist yn de lift en koenen der sels net by yn. Ik bin fia de trep nei de 6e ferdieping draaft en ha dêr op it liftknopke drukt. Ja, je moatte soms even kreatyf wêze. Doe ’t we de keamer binnen kamen mei de kist en de skraagjes, krigen we in hertlik wolkom.
In tige skelle stim rôp ’t de hoeke fan de keamer “Agoeie! Agoeie!!” It wie harren papegaai “Rico”. En Rico wie went om oeral mar dan ek oeral kommetaar op te jaan. We fregen mefrou wêr ’t se de kist it leafste ha woe, en sawat by elk foarstel dat we diene, sei Rico lûd: “Ah jonge ja juh!”.
Sille wy him dêr delsette? “Ah jonge ja juh!”.
Bytsje nei links? “Ah jonge ja juh!”.
Sa tefreden mefrou? “Ah jonge ja juh!”.
En ik tink dat Rico ek wolris mei nei in fuotbalwedstriid west hat want hy wie sa no en dan ek behoarlik grof yn syn wurdkar.
In pear dagen letter kaam ik wer yn harren flatsje om menear nei ’t hôf te bringen.
“Agoeie! Agoeie!!”. Rico stie mei syn koai boppe op de kist. Neffens mefrou hie der wol in minne wike hân, om’t er syn baaske miste, wêr’t der oars sa lekker mei kletse koe. Op de fraach, sille we him no mar mei nimme, antwurde Rico noch ien kear, no wat sêfter, “Ah jonge ja juh!”…
De Kistemakker
Hindrik Ype de Vries
Marsherne 8, 9013CG Poppenwier
06 148 256 77 | info@dekistemakker.nl
Foto: David Clode | Unsplash
