De Reiddomp fan de Modderige Bol
Friesland - 15-09-2023
Column
Sake P. Roodbergen
“We hawwe in Wetterbolle sjoen, op de Modderige bol”, wie it boadskip fan Anneke Goerres fan Akkrum. Tegearre mei Styn de Vries fearen se op de middei fan dy fiifde septimber fan de Wide Ie by Grou troch de Jansleat, rjochting De Veenhoop.
Nei de Lytse Bol en de smelle trochgong dêrnei komme jo op de folle widere Modderige Bol. Daliks links leit in fikse gloppe dêr’t by ’t foarjier de Blaustirns (Zwarte stern) briedt op de blêden fan de moaie wytbloeiende Swanneblom (Waterlelie).
It sjen fan de Reiddomp is al in keunststikje yn de septimbermoanne, mei it Reid en de Tuorrebouten yn sa’n tichte fegetaasje. It giet om in reagerachtige fûgel fan de sompen en wiete feanen. In net-algemiene soart, mar wol typysk foar it Fryske wetterlân. In fûgel boppedat dy’t troch syn heimsinnige libbenswize net faak sjoen wurdt, en seker net oerdei. In soart dy’t yn ús lân oerwintert en yn de santiger jierren sterk tebekrûn is troch strange winters, en dy’t no stadichoan wer terrein werom wint. Ik wist net better as dat de Roerdomp yn it Frysk Reiddomp hjit. Dat is ek de namme dy’t yn 2004 fêstlein is yn it boekje Nije list fan Fryske Fûgelnammen, fêststeld troch in wurkgroep fan tsien Fryske fûgeltsjeminsken, byinoar roppen troch de Provinsje en it Biologysk Wurkferbân fan de Fryske Akademy.
“Styn seit, dit is de Wetterbolle’, gong Anneke fierder. Dat levere in petearke op oer âlde en nije nammen foar fûgels. Ik socht nei dizze namme yn âlde wurdboeken fan de tachtiger jierren fan de foarige iuw. Gjin Wetterbolle. Mar wol fûn ik, en dat is aardich, Marbolle en Reidbolle as âlde nammen foar ús Reiddomp. It part ‘bolle’ lit him dus wol fine en hat wol seker in relaasje mei ús reidfûgel. Want it sonoare lûd fan de Reiddomp by’t skimerjûn simmerdeis liket danich op it âljen fan in oerdwealske bolle. En dan jout Styn noch it riedsel op: “En hoe sit dat dan mei it wyfke...”
Foto: Adri de Groot
