Nije natoergids oer spinnen, wantsen en sweefmiggen
Friesland - 03-05-2023
Column
Sake P. Roodbergen
Oer in pear wiken ferskynt in natoergids oer fyftich spinnesoarten, fyftich wantsesoarten en fyftich soarten sweefmiggen. Fan de spinnen komme der yn ús lân sa’n seishûndert soarten foar. Oan wantsen en sweefmiggen telt ús lân likernôch trijehûndert soarten.
Dit wurdt de achtste Frysktalige natoergids dy’t ik makke ha. Ik begûn de rige mei Fûgels yn it jier 2005. Yn it jier 2013 ferskynde de twadde, mei de namme Blommen, oer wylde planten yn ús omjouwing. De Fryske natoerorganisaasje It Fryske Gea brûkte de fûgelgids yn in ledewerfkampanje ta gelegenheid fan har 75-jierrich bestean as natoerferieniging. No dus de achtste yn de rige. Foar it meitsjen fan dizze natoergids ha ik de help ynroppen fan deskundigen, lykas Peter Koomen, de konservator fan it Frysk Natoermuseum yn Ljouwert. Foar de oare twa groepen frege ik minsken fan it ferneamde Naturalis Biodiversity Center yn Leiden. Dat is ek it natoer-sintrum dat de prachtige determinaasje-app Obsidentify ûntwikkele hat. Bedoeld om maklik lytse bistkes en planten op namme te bringen.
Yn in Algemiene Ynlieding fan dizze nije natoergids beskriuw ik de wichtichste saken oangeande dizze trije groepen fan saneamde Lidpoatigen. Dan folgje fyftich soartbeskriuwingen fan elk fan de trije groepen lytse bistkes. Yn in Yndeks achteryn steane alle nammen, de Fryske, de Hollânske en de wittenskiplike. By elke groep wurdt in tal boeken neamd mei mear ynformaasje oer de soarten. It earste eksimplaar wurdt ynkoarten oerhandige oan de boargemaster Tjeerd van der Zwan fan de Gemeente Heerenveen, dy’t letter dit jier ôfskied nimt. De natoergids wurdt útjûn by Utjouwerij Wijdemeer yn Dokkum. De opmakker is Richard Bos fan Ljouwert. De gids is yn alle boekhannels te keap.
Tekst Sake P. Roodbergen, Akkrum
Foto: Cover Fryske natoergids
-ffffff-4-4118.webp)
