Friesland - 26-06-2024

Column

Sake P. Roodbergen

Grote teunisbloem, Oenothera glazioviana

Yn de jûn fan de 9e juny fan dit jier bloeiden de earste trije blommen fan de Grutte nachtpit yn ús tún. Op trije ferskillende planten! Wat in timing. It wie yn de snoarje fan de kâlde oant tige kâlde dagen. Op de middei fan de tsiende juny wie it by ús achter hûs 10,5 graden Celsius. In djipte-rekord, in lytse fjirtjin dagen foar de langste dei! De Grutte nachtpit is goed te herkennen oan syn grutte giele blommen. Dy steane yn trossen boppe-oan de foarse stâle. Oerdei binne de blommen sletten; it iepenjen yn de jûn bart yn in pear sekonden. Je kinne der by stean gean te wachtsjen. As de sinne ûnder is wurdt troch in tal nachtflinders in besite brocht oan de blom. Flinters mei in lange tonge, lykas de moaie groep fan de grutte pylksturtflinters. Mar ek it gewoanere Pistoaltsje snobbet graach fan it stomoal en de nektar fan de Nachtpit-blom (sjoch foto).

Foto 1: Gamma-uiltje in Teunisbloem

Dizze brune trekflinter hat op de wjukken in dúdlik wyt figuerke dat tige tinken docht oan de Grykske letter y, de ‘gamma’, fandêr de Hollânske namme Gamma-uiltje. Elke Nachtpit-blom bloeit mar 24 oeren en ferwylket dêrnei. Mar omdat de plant hûnderten blommen produsearret, duorret de bloeitiid samar fjouwer moannen. Yn it wyld groeit de Nachtpit graach op wat sânige grûn, leaft wat iepen en drûch. It is in prima túnplant, dy’t suver gjin ûnderhâld easket. Op de ûnderste foto makket de Nachtpit in moaie kombinaasje mei Montbretia en Hortensia. By’t hjerst komme lytse sied-itende sjongfûgeltsje op de hege planten ôf. Benammen de bûnte, kleurrike Putterkes (of ‘Distelvink’) en oare Finken sykje graach har miel op de útbloeide Nachtpit.

Foto 2: Teunisbloem, Hortensia en Montbretia

Boarnen: Natoergidsen Fûgels, Blommen en Nachtflinters (Roodbergen)

Tekst en foto's: Sake P. Roodbergen, Akkrum

Columns Sake P. Roodbergen