Sweefmiggen op it Klimmerblêd (Klimop)
Friesland - 17-11-2021
Column
Sake P. Roodbergen
Yn Middelpuntnûmer 20 joech ik oandacht oan in trijetal skermblommen. De foto liet in blomskerm sjen mei tal fan ynsekten, gauris sweefmiggen, dy’t sa betiizjend op wespen lykje. Dizze kear in ferfolch op it sweefmigge-ferhaal.
It Klimmerblêd is in wat dwerse plant. Krekt op it stuit as oare planten fan it bosk (en ús tún) har sied ferspraat hawwe en har tariede op it kâlde seizoen, de winter, komme de blommen fan it Klimmerblêd (Klimop, Hedera helix) yn ’e bloei. Folslein tsjin de trend fan de natoer yn, soenen je sizze. Mar wol prachtich foar de hjersttún. Want it Klimmerblêd lûkt mei dizze timing noch eefkes in geweldich tal ynsekten nei him ta. Op in wat sinnige dei, lykas de 28e septimber, wie it in spektakel op en om de blomkopkes fan it Klimmerblêd. Gauris wurdt it Klimmerblêd ryklik snoeid omdat er wat útbundich groeit. Mar sa wurde wol de bloeitoppen fan de tûkjes fuorthelle en bliuwt in ekologysk ûnynteressante strûk oer. En dat kin better! En helje we tagelyk de lêste lytse bisten nei de tún ta. Mar ek gruttere. Want de opfallende read-wyt-swarte Nûmerflinter, better bekend ûnder de Hollânske namme Atalanta -mei de prachtige Latynske namme Vanessa atalanta- is ien fan de lêste deiflinters dy’t noch graach eefkes snobbet fan de rike huning en nektar fan de Klimmerblêd-blom. Mar de meast opfallende foarstelling wurdt fersoarge troch in grutte groep fan folle lytsere bisten, de sweefmiggen (zweefvliegen, Syrphidae). Mar al te faak wurde yn de ûnskuldige sweefmiggen gefaarlike wespen sjoen. Dat hat grif te krijen mei de kleurekombinaasje giel en swart. Minsken tinke dan al gau-achtich oan de stekkende wesp. Mar sweefmiggen binne folslein ûnskuldige ynsekten: se hawwe gjin angel en slikje gewoan wat fan de nektar en it stomoal fan blommen. En omdat se dêrby fan blom nei blom fleane soargje se foar de ûnmisbere bestowing. Yn dy sin giet it om in bistegroep mei in kolossale wearde foar de natoer. Der binne yn ús lân mar leafst 363 soarten sweefmiggen beskreaun, skreau ik yn Middelpunt fan ein septimber. Sechstich dêrfan wurde troch de kenners besjoen as net-lânseigen. Yn ús tún, op ús Klimmerblêd, falt it foarkommen fan in hânfol te ûnderskieden soarten op. Twa dêrfan binne de Bosbijvlieg en de Gewone pendelvlieg. De sweefmiggen hawwe noch gjin Fryske nammen krigen! Op de foto sit de earstneamde links op in blomboltsje fan it Klimmerblêd. Ik makke de foto op dy lêste moaie septimberdei, de 28e.
Tekst en foto Sake P. Roodbergen
Bron: Natoergids Deiflinters en Libellen (Utjouwerij Wijdemeer 2015)
Foto: Bosbijvlieg
Naar overzicht
