De útfeart foar myn beppe
Friesland - 04-03-2025
As útfeartfersoarger komst yn de meast yntymste mominten fan in minske syn libben. It is in fak dat faak emosjoneel is, mar ek hiel tichtby it libben stiet. Mar wat as it net om in frjemd giet, mar om dyn eigen famylje, om dyn beppe? Dan wurdt it ynienen hiel persoanlik.
In pear jier ferlien mocht ik de útfeart fan myn beppe regelje. Fan it momint dat it berjocht kaam, trille myn hiele liif eefkes. Se hie in bysûnder plak yn myn libben, se wie in waarme, leave frou dy't altyd foar elkenien klearstie. It wie de mem fan myn mem, en myn mem wie al in pear jier derfoar ferstoarn. It stjerren fan in bern docht wat my in minske, en ek by myn beppe is dit fertriet nea weirekke. Beppe woe graach dat ik har útfeart regelje soe en dat fielde swier. Dochs wist ik ek: dit wie har lêste winsk, en ik moast derfoar soargje dat alles krekt sa gean soe as sy it woe.
It is yn sa’n situaasje in syktocht tusken profesjoneel wêze en tagelyk de emoasje tastean. Ik seach hoe’t ús famylje byinoar kaam, hoe’t wurden fan leafde en oantinkens dield waarden. It wie net allinnich in ôfskied, mar ek in fiering fan har libben. Der waard yn die wike ek lake.
Wat my it meast bybleau, wie de yntinsiteit fan de leafde en de wurdearring dy’t te fernimmen wie yn ‘e sfear. Soms binne der gjin wurden nedich; sa wie dêr de lêste rit fan ús beppe nei it hôf. Ik stapte yn’e rouwauto, dy’t ik dizze kear sels ride soe, en sa ynienen gie de oare doar iepen en stapte myn muoike yn. Hja lei in hân op myn skouder en sei: ‘Wat soe dyn mem grutsk op dy wêze’. In pear wurden mei in djippe lading. In trien rolle oer myn wang en sa siden we nei it hôf.
In útfeart foar myn eigen beppe regelje wie net maklik, mar it wie ek in eare. It wie it lêste kado dat ik har jaan koe: in ôfskied dat rjocht die oan wa't sy wie. It is in taak dy't ik mei ynmoed doch, hoe dreech it soms ek is. Om’t it úteinlik giet om mear as it regeljen fan in seremoanje – it giet om it bewarjen fan oantinkens, it fieren fan in libben en it jaan fan in weardich ôfskied.
Leo Boermans
