Kantsitter
Friesland - 14-09-2021
Column
Sake P. Roodbergen
Yn de noardwestlike hoeke fan it Tynjebosk leit in moaie fiver. It Tynjebosk is in besit fan de natoerterrein-behearder Staatsbosbeheer. Dizze fiver leit op ús rûte as we fytse nei Boarnburgum, om dan oer it moaie fytspaad lâns de Drachtster Ie de sirkel rûn te meitsjen rjochting De Veenhoop en sa, troch it Lege Midden wer nei Akkrum.
By de keunstmjittige fiver stiet in kreaze bank. In aardich plak om eefkes in stop te meitsjen om wat te iten, te drinken of gewoan wat om jin hinne te sjen, acht te slaan op de planten oan de wetterkant en te lústerjen nei de fûgels.
Fuortby de bank is in strântsje, mei sân. Fansels gaadlik om de hûn swimme te litten, mar ek in apart plakje om in hiele oare reden. Alle kearen as we dêr binne sjogge wy eefkes nei dit strântsje en hast alle kearen is it raak: in Kantsitter, in algemiene libel. Hast altiten in mantsje. De Fryske namme koe net better keazen wêze: hy sit altiten oan de kant fan it wetter. De Hollânske namme is Gewone oeverlibel, en ek dy namme jout syn gedrach goed wer.
De Kantsitter is ien fan de middelgrutte libellen. De grutsten wurde yn it Frysk ‘biter’ neamd, Hollânsk: glazenmaker. De lytsten binne juffers. It mantsje fan de Kantsitter is blau fan kleur; it wyfke is alhiel oars: it hat in gielgriene kleur en it liif is oerdutsen mei in soarte fan raster fan swarte strepen (sjoch foto’s). Dat wyfke ferskynt gauris yn tunen.
Foto en tekst Sake P. Roodbergen, Akkrum
Foto: Paring gewone oeverlibel
Naar overzicht
