Stikelflinter (Distelvlinder, Vanessa cardui)

Friesland - 23-07-2025

Column

Sake P. Roodbergen

De Stikelflinter is in wat heimsinnige deiflinter yn ús lân. In trekflinter dy’t fan fier komt, fan súdlik fan de Sahara yn Afrika. It heimsinnige hat ek te krijen mei de ûnfoarspelberens. Yn guon jierren wurdt dizze kleurrike grutte flintersoart in hiel soad sjoen; yn oare mar in lyts bytsje. Op 14 july waarden de útkomsten bekend makke fan de Flintertelling fan it wykein dêrfoar, fan 11 oant en mei 13 july. De ynteressante útslaggen fan dizze flintertelling –in jierliks barren- binne werom te finen op Google/Wikipedia ûnder Tuinvlindertelling 2025.

Grutte winners wienen de Nûmerflinter (Atalanta), mei 23.348 waarnimmingen, de Lytse wite koalflinter (Klein koolwitje), mei mar krekt wat minder: 23.214, en as tredde de Deipau-each (Dagpauwoog), mei 21.988. Dit trio stuts mei kop en skouders boppe alle oare 23 waarnommen deiflinters út. Nûmer fjouwer, de bekende giele Sitroenflinter bleau mei 9634 waarnimmingen, noch krekt ûnder de tsientûzen. Het oantal fan 940 telde tige bysûndere Keninginnepaazjes wie foar my in ferrassing. Dy opfallende deiflinter sjogge wy yn ús provinsje suver nea! Dochs groeie hjir wol aardich wat waardplanten fan dizze flinter, de Wylde woartel (Wilde peen). As nûmer 26 kaam de tige bysûndere Keizersmantel út de bus, in prachtige perlemoerflinter dy’t eins allinnich mar yn it uterste suden fan ús lân waarnommen wurdt. Der waarden dochs noch 126 eksimplaren fan sjoen.

De Stikelflinter waard 1540 kear trochjûn oan De Vlinderstichting. Anneke en ik seagen dizze ikoansoart op de Finnestikel (Akkerdistel) oan de kant fan de Boarn fuort by ús hûs. It is eins wat spitich dat in pear wiken letter dizze ekologysk weardefolle seame lâns de Boarn al meand waard.

De Stikelflinter naam plak 19 yn op de rige fan telde soarten fan 11 oant en mei 13 july. Der waarden 1540 telde eksimplaren fan trochjûn.

Tekst en foto's: Sake P. Roodbergen, Akkrum

Columns Sake P. Roodbergen