Kolibryflinter
Friesland - 19-08-2022
(Kolibrievlinder, Macroglossum stellatarum)
Column
Sake P. Roodbergen
Yn myn natoerkollum fan juny kaam hiel efkes in lid fan de groep fan de Pylksturten op it aljemint: de moaie Oaljefantsflinter dy’t yn it Hollânsk Groot avondrood neamd wurdt. Ien fan de bestowers fan de Nachtpit (Teunisbloem), sa waard skreaun. De lêste wiken komme fan ferskillende kanten meldingen fan de Kolibryflinter, ien fan de meast bysûndere fan dizze moaie groep fan de Pylksturten.
Dizze groepsnamme komt fan de hurde pylk boppe-op it ein fan de sturt fan de dikke rûp. De measte Pylksturtflinters fleane nachts. Nachtflinterers moatte somtiden op it djippe tsjuster fan nei tolven wachtsje foardat dizze grutte nachtflinters op it wite lekken ferskine. Mar de Kolibryflinter wurdt ek gauris oerdei sjoen: it is in saneamde dei-aktive nachtflinter. De Kolibryflinter wurdt it measte sjoen as er -sa as it liket: bewegingleas- foar in blom stiet en mei syn tige lange tonge nektar opsûcht út de djipte fan de blom, lykas in Petunia of Lavendel, of –meastentiids yn it suden: Miedesealje (Veldsalie) (sjoch foto).
Der binne mar in pear oare bistesoarten dy’t dit keunstke fan it bewegingleas sweevjen ek kinne. Dat binne de flearmûs, de sweefmich en fansels de kolibry’s, de fûgeltsjes. Dy tredde groep komt yn ús lân net foar, de earste twa wol. Dizze ‘act’ kostet in protte enerzjy en dêrom moatte se in protte nektar drinke of oar enerzjyryk fiedsel ite.
Mantsje en wyfke fan de Kolibryflinter libje foar in flinter relatyf lang: sa’n tsien oant tritich dagen. Der binne op de hiele wrâld goed tûzen Pylksturtsoarten. De measten libje yn de tropen en subtropen. Yn Nederlân libje njoggentjin soarten; yn België tsien mear! De twa meast talrike binne de Populierepylksturt en de Dinnepylksturt.
Boarne:
Natoergids Nachtflinters (Sake P. Roodbergen, Utjouwerij Wijdemeer 2016)
Tekst en foto: Sake P. Roodbergen, Akkrum
