FNP wol fûns finansjele problemen sportferieningen en doarpshuzen
Heerenveen - 18-11-2020
De FNP yn de gemeente Hearrenfean wol dat de gemeente Hearrenfean in fûns oprjochtet foar sportferieningen en doarpshuzen dy’t yn de finansjele problemen komme troch maatregels fan de oerheid om der foar te soargjen dat it Covid 19 firus net fierder ferspraat wurdt. De fraksje tsjinnet hjirfoar moandei by de behanneling fan de begrutting foar 2021 in amendemint yn. De FNP wol foar dit fûns 1 miljoen euro reservearje.
Doarpshuzen en sportferieningen binne wat de FNP oanbelanget twa fan de wichtichste eleminten foar de mienskipssin sa oft we dy yn Fryslân kinne. Ek bepaalde sektoaren fan de ekonomy ha it op it stuit dreech. Tink mar oan de evenemintenbranche en foaral de hoareka. Mar neffens de FNP binne dit problemen dy’t lanlik oanpakt wurde moatte.
Mar wêr’t de lanlike oerheid gjin kompensaasje regelingen foar hat binne de sportferieningen en doarpshuzen en de MFA’s. Dizze sektoaren binne foar in grut part ôfhinklik fan de lokale oerheden. “Earder ha we as gemeente ek sjen litten dat wêr der fragen fan út de topsport binne we wol finansjeel byspringe wolle. Sjoch mar nei de Turnhal en Thialf. No it om de breedte sport giet moatte we ek sjen litte dat we der steane” stelt fraksjefoarsitter Ate Eijer.
Neffens de FNP moatte dêrom sawol sportferieningen as doarpshuzen by de gemeente oanklopje kinne foar finansjele stipe. Ate Eijer: “As gemeente ha we hjirfoar de mooglikheden troch in kompensaasje fan it ryk en ek is der foar 2021 noch in oerskot op de begrutting wêr’t we in berop op dwaan kinne”.
Naar overzicht
