Akkrumer Bosk en Beammen

Friesland - 13-09-2022

Column

Sake P. Roodbergen

Tongersdei 18 augustus klokslach acht oere kaam de optocht yn Akkrum oan. 116 beammen yn 75 kisten fan elk oardel ton (1500 kilo). Beammen fan ferskate soarten mar allegearre leafbeammen mei blêd.

It blêd dat it begjin is fan alle Libben. It blêd dat blêdgrienkerrels befettet dy’t it fermogen hawwe fan de koalsoerassimilaasje: fan koalsoergas út de loft, en wetter út de grûn wurdt yn dy kerrels en mei help fan de enerzjy út sinneljocht sûkers makke (C6H12O6). Dy sûker (glukoaze) is it basisfiedsel fan elk libben wêzen, ek de minsk. Sûnder grien blêd gjin Libben op ús ierde. ‘It Bosk’ betsjut dus noch al wat. Sneontejûn om sân oere hjitte Zwier Kroese, foarsitter fan de Akkrumer Bosk-kommisje, wethâlder Gerrie Rozema fan de Gemeente Heerenveen wolkom om it Bosk-barren yn Akkrum formeel te iepenjen. De eftergrûn fan ‘Meet me in the Forest’ leit yn de winsk fan mear fergriening, fan miljeu-bewust wurden. Nea earder hat de needsaak fan omtinken om ús griene omjouwing sa twingjend west as hjoed-de-dei. Wy moatte as minskdom oplossingen fine foar grutte problemen lykas de klimaatkrisis en it ferlern gean fan bioferskaat (‘biodiversiteit’), fier fuort, mar ek yn de eigen omjouwing.

As it programma ôfrûn is krijt trijekwart fan it Bosk in plakje yn Akkrum sels, de oare beammen wurde ferdield oer doarpen yn de Gemeente Heerenveen.

Yn 2021 ferskynde myn sânde natoergids Beammen. It liket suver wol in opsetsje foar de Akkrumer manifestaasje fan no. De natoergids hat in logysk plakje krigen yn dit gehiel. De gids wurdt by Liuwe Brolsma te keap oanbean mei in bysûndere banderol fan ‘Meet me in the Forest’. Op sneon 24 septimber is der yn it havengeboutsje in sinjear-sesje troch de skriuwer. Ek eardere natoergidsen meie dêr oanbean wurde. Folgje de webside Akkrum.net

Tekst en foto: Sake P. Roodbergen, Akkrum

Columns Sake P. Roodbergen