Argusvlinder en Keizersmantel: ferlies en winst

Friesland - 27-06-2023

Column

Sake P. Roodbergen

Mei ús deiflinters giet it, oer it algemien sprutsen, net goed. Dêrmei bied ik gjin nijs. In typysk foarbyld fan ien fan dy flinters dêr’t it echt min giet is de Argusflinter, in soart dy’t by de saneamde Aurelia’s heart. Net lang lyn waard fan dizze flinter noch sein: algemiene standflinter. Mar de lêste tsien jier is dúdlik sprake fan tebekgong.

Yn it nije, Hollânsktalige boek ‘Dagvlinders in Fryslân; veranderingen vastgelegd’, dat yn 2021 útjûn waard troch de Vlinderwerkgroep Friesland, stiet it oer de oarsaak sa: “Graslandvlinders, waaronder de argusvlinder, hebben het zwaar in Nederland. Het areaal aan bloemrijke, halfnatuurlijke graslanden is in de laatste decennia fors gekrompen.” Soksoarte fan gebieten hat de argusvlinder nedich foar syn fuortplanting en foar syn fiedsel (nektar).

It is dêrom hiel ferrassend dat in deiflintersoart dy’t eins yn ús lân as útstoarn beskôge waard, ynienen yn dizze selde perioade werom liket te kommen. We hawwe it oer de Keizersmantel. Dizze moaie parlemoerflinter is de grutste fan in groep fan bysûndere deiflinters wêrfan yn ús lân trettjin soarten foarkomme. Yn ús provinsje wurdt bygelyks de Sulveren moanne (Zilveren maan) yn sompe-achtige gebieten noch wolris sjoen.

Fan de Keizersmantel wurdt op Wikipedia op dit stuit ferteld: “Deze vlinder staat in Nederland sinds 2019 niet meer op de Rode Lijst als verdwenen of bedreigd, omdat ze de laatste jaren in steeds groter aantallen wordt waargenomen”. Yntusken is sels al fuortplanting yn ús lân fêststeld. Parlemoerflinters hawwe hiel faak in relaasje mei in fioeltsje-soart.

Graach soe ik fan lêzers fan Middelpunt waarnimmingen fan de hjir neamde twa deiflinters ûntfange. Om werkenning wat makliker te meitsjen heakje ik fan beide soarten in plaatsje ta.

Foto 1: Argusvlinder

Foto 2: Keizersmantel

Tekst en foto's Sake P. Roodbergen, Akkrum

Columns Sake P. Roodbergen