Sidesturt

Friesland - 09-12-2025

Column

Sake P. Roodbergen

De prachtige Sidesturt is in fûgel sa grut as in Protter (Spreeuw). Hy hat in rossich-brún fearekleed en by opwining set er in tûfe op! Om de eagen en ûnder de snavel is swart te sjen.

Swart is ek de kleur fan de wjuk mei strepen wyt, giel en stikjes rôze-read. De Sidesturt is in boskfûgel dy’t briedt yn de taiga, it gebiet fan tichte bosken yn Noard-Ruslân en de trije lannen fan Skandinavië: Noorwegen, Sweden en Finlân. De fûle kjeld en it opreitsjen fan it foer –benammen de beien fan lege planten- driuwe de fûgel by’t winterdei nei súdliker lannen.

En dan bedarret de boskbewenner sa no en dan ek yn ús lân. Somtiden giet it om in inkelde fûgel. Jan de Jong, de fûgelman fan de Ljouwerter Krante , fertelt dat eins elk jier wol in inkelde Sidesturt sjoen wurdt yn ús provinsje. En in inkelde kear giet it noch om in grutte mannichte ynstee fan ienlingen. Sa’n ynfaazje komt lang net elk jier foar. Yn 2004/2005 wie der sprake fan in echt grutte ynfaazje, fertelt de fûgelkenner.

Yn it ferline waard dizze opfallende gast der fan fertocht dat hy by’t winterdei sykten nei ús omkriten brocht. Hy waard dêrom yn ús lân yn it Hollânsk Pestvogel neamd. Lokkigernôch seagen de Friezen benammen de moaie foarm en kleur fan syn kuif en de kleurrike wjuktippe en achterliif. Hy krige dêrom de Fryske earenamme Sidesturt, dy’t wiist op de subtile, gielige bân fan it útein fan de sturt, dy’t –fan tichteby besjoen- skitterjend ôfstekt tsjin it waarme brún fan de sturt-ûnderside.

Tekst: Sake P. Roodbergen, Akkrum

Columns Sake P. Roodbergen