Argusflinter op Simmertiksel

Friesland - 23-09-2026

Column

Sake P. Roodbergen

In bysûndere kombinaasje: in seldsume deiflinter op in net al te gewoan ûnkrûd. Alderearst: ûnkrûden besteane fansels net. Der besteane wól wylde planten dy’t we leaver net yn ús kreas ûnderhâlden túntsje hawwe. Mar yn de natoer is elke plant in gewoane wylde plant. Guon wat moaier as de oare, mar dat is it dan ek. De Argusflinter is in deiflinter. Hy heart by de soarten dy’t yn ús hiele lân –en dus ek yn ús provinsje- hurd tebek rinne. Sa hurd dat der sels in spesjale aksje geande is om alle Argusflinters troch te jaan dy’t wy as publyk waarnimme.

De Simmertiksel is in hege plant. Gauris stiet er lâns de kant fan in sleat of feart. Dizze plant hat de Hollânske namme Akkermelkdistel. Hy heart by de plantefamylje fan de saneamde Kompositen (Composieten). De Molktiksel is in wat lytsere soart dy’t in soad op de Simmertiksel liket. Sy hearre beide by de plantefamylje fan de Kompositen. De Kompositen foarmje in tige grutte plantefamylje. Ek de Hynsteblom heart by dizze famylje. De Simmertiksel wurdt wol sjoen yn de wâlkant fan de Kromme Knilles tusken Akkrum en it Prinses Margrietkanaal.

Boarnen: Blommen (Sake P. Roodbergen), Bornmeer 2013 Deiflinters en Libellen (Sake P. Roodbergen), Wijdemeer 2015

Columns Sake P. Roodbergen