Grutte Wite Reager
Friesland - 10-03-2026
Column
Sake P. Roodbergen
Wa’t wolris op de fyts of mei de auto troch ús Fryske kontreien giet en niget hat oan de stoffearring om him of har hinne moat it wol opfallen wêze: gauris sjocht men yn it fjild in wite reager. Steande oan in sleatskant of omstappend midden yn in greide. Fan betinken kin men wol hawwe: der wurdt socht nei in mûs of in kikkert. Fansels sjocht men it measte de ‘gewoane’ donker kleurde Ielreager, dy’t yn it Hollânsk de namme Blauwe Reiger draacht.
Yn it Raerderbosk is foar ús yn it midden fan Fryslân de bekendste briedkoloanje fan Ielreagers, tegearre mei Roeken. Heal febrewaris kinne der al aaien wêze fan dizze reager.
De komst fan de Grutte Wite Reager nei ús lân wurdt gauris yn ferbân brocht mei de ûntwikkeling fan de Oostvaardersplassen fan 1968 ôf. It earste briedgefal folge yn 1978. Ien jier letter, yn 1979 briedde der ek in Lytse Wite Reager yn de Oostvaardersplassen. Dizze Lytse is no in aardich talrike briedfûgel yn ús lân.
Mear en mear wurdt noch in tredde wite reager yn ús lân sjoen, de Feereager (Koereiger), dy’t noch in bytsje lytser is as de Lytse Wite Reager.
Bronnen: 1. Nije list fan Fryske fûgelnammen (Fryske Akademy-Ljouwert 2004) 2. Fûgels (Sake P. Roodbergen Bornmeer 2005)
Foto 1: Grutte Wite Reager
Foto 2: Feereager
Naar overzicht
